إلى من يريدون تطبيق الشّريعة في تونس, أستحلفكم بالله إقرأوا

أخي المسلم , أختي المسلمة أخاطب فيكم اليوم عقولكم المستنيرة و ضمائركم الحية. إنّ هذه الأرض تجمعنا و لن نتقاتل عليها مهما كلّفنا ذلك. مهما إختلفنا و تعدّدت إتجاهاتنا فإنّنا نبقى أولاد بلاد إسمها تونس أولاد أم وحدة تاريخها يرجع إلى 3000 سنة...ء

أخي المسلم, الحديث عن الشّريعة يتطلّب تعريف كلمة الشّريعة و فهم كنهها و ليس فقط الصدح بها في الشّوارع.

 الشريعة في معناها اللغوى : على مورد الماء أى مكان ورود الناس للماء ، ومنه قولهم : شرعتْ الإبل، أى حضَرِتْ إلى مورد الماء واصطلاحا. ما شرعه الله لعباده من الدين، مثل الصوم والصلاة والحج.. وغير ذلك، وإنما سمى شريعة لأنه يقصد ويلجأ إليه ،كما يلجأ إلى الماء. إخي المسلم هذا المنبع هم قاسم مشترك كل التونسيين, تاريخيّا و ثقافيا سواء كانوا متدينين أو غير متدينين فلا تسمّموه بالسياسة.  فلنعمل بقوله تعالى: "وأمرهم شورى بينهم". اليوم تم إنتخاب مجلس تأسيسي بمثابة مجلس الشورى بش يكتب دستور للبلاد.

أخي في الله إستحضر قوله تعالى: "يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْماً بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ"أخي المواطن لازمك تعي أنه في الشوارع و عالأنترنت برشة ناس باعوا رواحهم و صفحاتهم لتجّار الدّين و برشة مكذوب عليهم زادة و الله يهدي الّي كان سبب ,الكلهم, واعين بالشيء هذا و إلاّ لا ,إنجرّوا وراء الأحداث يحركوا في الشارع و سقطوا إلى التهم و القدح و غيرو لفائدة إتجاه سياسي معين. اللي خرج في الشوارع خرج عالخبزة و الحرية و الكرامة و مرمدو بحالو و ضربوه و فالأخر خلاوه مطيش دمّو يسيح...أسألكم بالله لو كان جيت في بلاسطو و تشوف الّي يجرى في تونس أش تحس؟.

زعمة هو خرج يطالب بالعودة إلى الرقّ وملك اليمين و العقوبات الجسديّة كالجلد، قطع أيادي  و الرؤوس في الساحات العامة، و الشنق كما نرى في بعض البلدان؟

اللّي يجمعنا لازمو يكون دستور يكفل الحرمة الجسدية و الحريات الفكرية و العقاؤدية, مفهوم المواطنة لازم يترسّخ في أذهاننا. الإختلاف مشروع و يتناقش ما بين الناس أمّا بش تفرض رايك على غيرك فإنك تظلمه و تتعدّالو على حقّو. الشريعة و الديمقراطية لا يتعارضان إلاّ إذا فهمت الشريعة على أساس إلغاء الآخر و هي ليست كذلك كما يروج لها حيث أنه القراءات ما هي إلاّ إجتهاد و الّي نشوفو فيه هو قراءات متشدّدة إقصائية ما هياش متاعنا. يا توانسة راكم هزّيتو العالم باللي عملتوه, ما تضيعوهش في الأمور الخلافية. التونسي إنسان مسالم يحب يعيش حر و كريم بطبعه لا يقبل التعدّي على معتقداته و مقدساتنه ودينه و لكنه زاده يقبل الإختلاف و ما يحكمش على الناس لأنه مبدأ الإستأثار بالحقيقة المطلقة ما ينجم يولّد كان الإستبداد و أخطر من ذلك الفكر الأوحد و الفاشية.كنتو صف واحد، جنباً إلى جانب حاربتو دكتاتورية بن علي تو لازم تحاربو دكتاتورية أنفسكم و آرائكم. إخوتي و أخواتي كان ما إقتعتوش نحترم رأيكم و كان مقتنعين ملتقانا يوم 20 مارس و الله ولي التوفيق

ثورة ؟

اليوم و بعد غياب طويل على الساحة البلوقوسفرية و الدخول الى الفايسبوك اللي فرض روحو على الساحة الافتراضبة نرجعو الى هالمدونة المحنونة. أولا ما نعرفش هل نهني الشعب بهالثورة؟ اللي صار الحقيقة تفاجئت بيه خاطر في مرحلة من المراحل ما نكذبش عليكم فقدت الأمل من انتفاضة أو حتى تغيير...اليوم و رغم الصعوبات و الثورة المضادة و التاَمر فاني متفائل, علاش؟ على خاطر الفرق البسيط بين البارح و اليوم أنه التونسي اليوم يتبع في اللي صاير رغم الضبابية في المشهد. الثورة هي مطالبة باعادة توزيع السلطة, توزيع المال و توزيع الاعتبار. الشرائح الاجتماعية البرجوازية و المتمعشين و القفافة و صبابة الماء عاليدين ماهبياش بش تقبل بالشيء هذا و بش يكبشو للخر. خلال الثورة الفرنسية تم اعدام الاَلاف و كذلك خلال الثورة في روسيا و في الاخر هالثورات بعد ما انتقموا من أعداء الثورة انقموا من الشعب نفسه و جابو انظمة قمعية. فهل الشعب اللي قام بثورة سلمية قادر على التخلص من الفساد و السراق بطريقة سلمية ؟ يتبع...