<h1>حرية التعبير </h1>

هالمدة, لاحظت الي عدد لاباس بيه من لوخيان المدونين يحكيوا على حرية التعبير و منهم وخينا سمسوم الي ديجا

أثار الموضوع

.عاد قلت ما فيها باس لو كان نشوفوا آشنية هادي حرية التعبير.حسب ترجمة متواضعة برشا قمت بيها من مطوية الديكْلاراسيونْ دي درْوَا دُو لُومْ جابوهالنا هاك العام جماعة من كندا للمدرسة متاعنا على خاطر ماهياش موجودة في المكتبة وقتها...في اللارتيكل 19 :لكل شخص الحق في حرية الرأي و التعبير مما يوجب الحق في الطمأنينة و عدم الخوف من ابداء الآراء مع حرية استلام و نشر المعلومات و الأفكار دون اعتبار للحدود الجغرافية و دلك بأية طريقة تعبير كانت. الي يحب يشوف تعريف ويكيبديا يحفر

هنا

.هالحكاية هادي تقعد في كراسة التربية المدنية بالطبيعة... يقولواألي المعارضين ماهمش ماخدين حرية التعبير هوما و الجراءد والروادن و التلافز..أنا نقول سيبنا مالكلام اللي ما نفهمش فيه بصراحة و هات نشوفوا الصغيرات متاعنا فاش قاعدين نعلموا فيهم...أكثر كلمة يسمعوا فيها هي أسكت وا إلا سكر فمك حاشاكم, و كان لقاوه يغني ولا يصور يقلوا: فاش تعمل ؟؟ آه برا شد قرايتك(تربية مدنية) و تره يحل فموا في موضوع هكة ولا هكة...تلقا كان البو شعل فيه فتيلة بلا زيت, يا آباء و يا أمهات راهوا لعقالة موش معنتها السكات والتطبيق من غير نقاش و إنسحاق الشخصية و الأساليب متاع لعياط ما تخلف كان الغصة و الفجعة حاشاكم. الطفل ولا المراهق ماهو إلا إنسان يحب و يكره وعندو دوق ورأي في الأشياء اللي حوله لازم نسمعوه ..والمواضيع الطابو (موش متاع الدبوسة) الحساسة معنتها لازم نحكيوا فيها موش تخليوها و نبداوا نْسَكْرُوا و نْتَلْفُوا.حاجة أخرى, بعد ساعات يبدى عم فلان ولا سي فلان قال حاجة, ياخي بالمشطة كلامو يولي صحيح تقول صدق الله العظيم... حرية التعبير تبدا مع العايلة و الصونص كريتيك يطْطَور مَالْمان ما يلزموش قمع أما لازمو نقاش موش حكم بالطاسة..